Францияда яратилган сунъий ошқозоности бези аппарати тиббий синовдан ўтказилмоқда. У 1-даражали қандли диабет билан касалланган беморларга мўлжалланган бўлиб, қонда қанд миқдорини автоматик равишда назорат қилиш ва инсулин инъекциясини қилиш имконини беради.

1-даражали қандли диабетдаги гипергликемия (қонда глюкоза миқдорининг ошиб кетиши) ошқозоности безидаги β-катакларининг ҳалок бўлиши билан боғлиқ, бу эса ўз ўрнида буткул инсулин етишмовчилигига олиб келади. Бундай ҳолатда беморлар қанд миқдорини доимо назоратда ушлашлари шарт. Ягона даволаш усули - инсулин терапияси.
Янги аппарат Diabeloop номини олган бўлиб, бутун жараённи автоматлаштиради. Қурилма унча катта бўлмаган қути кўринишида бўлиб, уни ошқозоности безига жойлаштирилади. Diabeloop аппаратига Bluetooth-модули ўрнатилган, уни смартфон орқали бошқарилади. Бемор фақатгина инсулин юборишни йўналтириши ва тахминий овқатланиш вақтини белгилаб берса бўлди.

Сунъий ошқозоности бези аппарати қондаги қанд миқдорини мустақил равишда назорат қилади. Ҳозирги кунда 1-даражали қандли диабетга дучор бўлганларнинг 15 нафари устида мазкур тадқиқот олиб борилмоқда. Айтиш жоизки, олимлар уларнинг сони янада ортишини таъкидлашмоқда. Агар бу тадқиқотлар муваффақиятли якун топса, унда Diabeloop аппарати 2017-йилнинг охиридаёқ сотувга чиқади. Маълумки, Францияда қурилма нархининг бир қисми тиббиёт томонидан суғурталанади.

Diabeloop муаллифлари қурилманинг нафақат беморлар ҳаётини енгиллаштиришига, балки доимий шифокор назорати остидаги беморлар сонининг қисқаришига умид билдирмоқдалар.