Британия газетасининг ихтиёрига 2003 йилдаёқ келиб тушган маълумотларга кўра, ўша вақтда Саудия валиаҳд шаҳзодаси бўлган Абдуллага 2003 йилнинг ўзида суиқасд қилиш режалаштирилган.

Британия терговчилари саудиялик диссидент, физик Муҳаммад Ал Массарийни Саудия Арабистонининг марҳум қироли Абдуллага нисбатан суиқасд қилишга алоқадорликда гумон қилишмоқда. Муаммар Каддафий эса жиноятнинг ташкилотчиси бўлгани эҳтимол, деб ёзади Independent нашри журналистлари ихтиёрига тушган маълумотларга таянган ҳолда.

Бу режа ҳақида эса, АҚШ собиқ президенти Билл Клинтоннинг маслаҳатчиси бўлиб ишлаган кейинроқ, "Ал-Қоида" жангариларини молиялашда айбланиб маҳкамага тортилган Абдураҳмон Аламудий қўлга олингач маълум бўлган.

Аламудий ўшанда америкалик терговчиларга Ливия ҳукумати бўлғуси қиролни унинг машинасига ракета йўллаш билан ўлдирмоқчи эканини билдирган. Ливия раҳбарияти ғаразли ниятини амалга ошириш мақсадида 1994 йилда Буюк Британияга кўчиб келган Массарийга учрашган. У ўз навбатида Лондонда истиқомат қилувчи Саудия бошқарувидан норози кайфиятдаги саудияликлар орасидан жиноят ижросига муносиб номзодлар топиши лозим эди.

Тергов тахминларига кўра, Массарий шу мақсадда 600 минг фунт стерлинг пул олган бўлиши мумкин. Аммо, Бирлашган қиролликнинг жиноятчиликка қарши курашиш миллий агентлиги ходимлари 2014 йили физик билан суҳбат ўтказганида Массарий айбловларни рад этган.