Россиянинг "Аэрофлот" авиакомпанияси 26 март кунининг иккинчи ярмида Қозоғистонга тўхтатилган парвозларни яна бошлади. Авиакомпанияга парвозлар амалга ошириш учун тегишли рухсатни Қозоғистон транспорт вазирлиги фуқаролик авиацияси қўмитаси тақдим қилди.

"2016 йилнинг 27 мартига белгиланган рейслар аввал чоп этилган режага кўра амалга оширилади", дейилган хабарда.

Қозоғистонга парвозларнинг тўхтатилишига Қозоғистон томонидан Россия авиакомпаниясига ёзги жадвал бўйича парвозларни амалга оширишга рухсат берувчи ҳужжатнинг тақдим қилинмагани сабаб бўлган.

26 мартда «Аэрофлот» куннинг иккинчи ярмидан Қозоғистонга барча парвозларни тўхтатишини маълум қилганди. Шу куни Қозоғистоннинг 6 та шаҳарига парвозлар бекор қилинди.

"Ёз-2016" парвозлар жадвалига кўра 27 мартдан 29 октябргача Москвадан Қозоғистоннинг етти шаҳарига ва у ерлардан Москвага мунтазам рейслар амалга оширилиши кўзда тутилган.