Россиянинг энг йирик авиакомпанияси "Аэрофлот"  26 мартнинг иккинчи ярмидан Қозоғистонга мунтазам рейсларни тўхтатди, деб хабар берилмоқда авиакомпания сайтида.

"Бу Россия авиакомпаниясининг 27 мартда кучга кирадиган парвоз жадвалига мувофиқ парвозларни амалга оширишга рухсат берувчи ҳужжатнинг Қозоғистон томонидан тақдим қилинмагани сабабли мажбурий чора бўлди. "Аэрофлот" Россиядан Қозоғистонга йўналишларда белгиланган авиаташувчи бўлишига қарамасдан, тегишли рухсатларни олмади. Ваҳоланки, авиакомпания бу рухсатни олиш учун аризани 2016 йил 12 февралдаёқ топширганди", дейилмоқда хабарда. 

Маълум қилинишича, "Ёз-2016" жадвалига кўра авиакомпания Москвадан Қозоғистоннинг Актау, Октобе, Олмаота, Остона, Атирау, Қарағанда, Чимкент шаҳарларига мунтазам парвозлар амалга ошириши кўзда тутилган эди. Шу муносабат билан авиакомпания ўз йўловчиларига яқин уч кунда Қозоғистонга бормасликни ва ундан келмасликни тавсия қилмоқда. 

Авиакомпания маълумотларига кўра, 26-27 мартга белгиланган Қозоғистонга ва у ердан Москвага 11та рейс бекор қилинди. Авиакомпаниянинг ушбу саналарга чипталар сотиб олган йўловчиларига чипталарга тўланган пулни қайтариб олиш имконияти тақдим қилинди.   

Қозоғистоннинг миллий авиакомпанияси Air Astana ҳам Москвага рейслар тўхташи мумкинлигини маълум қилди. Келишмовчиликка Air Astana йўлга қўяётган Остона-Улан-Батор йўналиши сабаб бўлмоқда. Қозоғистон авиакомпанияси хорижий авиаташувчилардан фарқли ўлароқ, Россия орқали Транссибирь йўналиши бўйлаб парвоз учун Россияга ҳақ тўлашдан бош тортмоқда.