Индонезиянинг Суматра оролида жойлашган Бенгкулу шаҳридаги Малаберо қамоқхонасида рўй берган тартибсизликлардан кейин ёнғин келиб чиққан ва натижада 5 киши ҳалок бўлган. Бу ҳақда Associated Press хабар берган.

Полициячиларнинг айтишича, маҳбуслар исёни гиёҳванд моддалар савдосига қарши кураш агентлиги ходимлари қамоқхонадан наркобаронлардан бирини олиб кетмоқчи бўлишганида бошланган.

Вилоят полицияси бошлиғи Бриг Гуфроннинг маълум қилишича, маҳбуслар бу наркобаронга садоқатларини билдириш мақсадида исён қилишган.

Қайд этилишича, ёнғиндан кейин маҳбуслардан бири шифохонага, 252 нафари бошқа қамоқхонага жўнатилган.

Индонезия гиёҳванд моддалар савдосига қаттиқ кураш олиб борувчи давлатлардан бири саналади. Бутун мамлакат бўйлаб доимий тарзда рейдлар ўтказилсада, гиёҳвандлар сони кейинги 1 йилда 4,2 миллиондан 6 миллионга етди.