Келиб чиқишига кўра, Бельгиянинг Антверпен шаҳридан бўлган, айни вақтда ИШИД жангариси ҳисобланадиган Ҳишам Шаиб Бельгия ва Европанинг бошқа ҳудудларида навбатдаги қонли терактлар амалга оширилишига ваъда қилди. Бу ҳақда VRT телеканали орқали хабар берилган.

Шаиб интернетда ўз қурбонини отиб ташлагани тасвирланган видеони жойлаштирган. У нидерланд тилида Бельгия халқи, Бельгия ҳукумати ва Европа давлатлари ҳамда ИШИДга қарши курашаётган халқаро коалиция аъзоларига мурожаат қилиб, таҳдид солган.

2015 йилнинг февралида Ҳишам Шаиб террористик Sharia4Belgium гуруҳи ("Бельгия учун шариат") аъзоси сифатида Антверпен суди томонидан сиртдан 15 йилга ҳукм қилинганди.

Бундан олдинроқ, АҚШ Давлат департаменти ИШИД томонидан Европада янги терактлар амалга оширилиши хавфи мавжудлигидан огоҳлантирганди.

22 март, сешанба куни Бельгия пойтахтининг аэропорти ва метросида қатор портлашлар содир этилди. Натижада, сўнгги маълумотларга кўра, 36 киши ҳалок бўлди, 230 киши жароҳат олди.