Вашингтондаги Смитсон институти авиация ва космонавтика Миллий музейида буюк фазогир Юрий Гагаринга ёдгорлик ўрнатилади.

Космонавт хотирасига бағишланган бюстнинг тантанали намойиш маросими инсоннинг фазога илк парвозига 55 йил тўлгани шарафига бағишланади ва 19 апрель куни бўлиб ўтади, деб хабар беради ТАСС нашри.

“Тарихдаги биринчи фазогирнинг бюсти дунёнинг энг катта бешта музейи қаторига кирадиган ҳамда АҚШда энг кўп ташриф буюриладиган музейга ўрнатилади. Бу кенг жамоатчилик, айниқса, ёш авлоднинг эътиборини 55 йил аввал содир бўлган бутун инсоният учун муҳим давр воқеасига жалб этишга имкон беради”, - деди ташкилот вакили Олег Жиганов.

Бюстни украиналик ҳайкалтарош Алексей Леонов яратди ҳамда ўз асари ва унга эгалик ҳуқуқини “Маданиятлар мулоқоти – Ягона олам” (“Диалог культур – Единый мир”) халқаро хайрия жамғармасига тақдим этди.

Эслатиб ўтамиз, 55 йил аввал - 1961 йил 12 апрель куни – “Восток” ракетаси бортида Юрий Гагарин билан “Бойқўнғир” космодромидан фазога учган. 108 дақиқа давомида ракета Ер шарини бир марта айланиб чиқиб, Саратов вилояти, Смеловка қишлоғи ҳудудига қўнган.

27 март куни Юрий Гагарин вафотига 48 йил тўлди.