АҚШ давлат котиби Жон Керрининг айтишича, президент лавозими учун Республикачилар партиясидан номзодларнинг мусулмонлар жамоасини мамлакатдан чиқариб юбориш ва терроризмга қарши кураш доирасида қийнаш мумкинлиги борасидаги фикрлари, Қўшма штатлар обрўсини тушириб юбормоқда. У бу ҳақда CBS телеканалининг Face The Nation кўрсатувида баёнот берди. 

“Бу ҳолат, АҚШдаги президентлик пойгасини кузатиб бораётган жаҳон ҳамжамиятини, "адолат билан айтганда шок ҳолатига туширмоқда", дейди у.

Унинг сўзларига кўра, республикачиларнинг бундай нуқтаи назари АҚШнинг ишончли ва жиддийлигини шубҳа остига қўяди.

Унинг қўшимча қилишича, юқоридаги масалаларнинг айримлари бўйича билдирилаётган фикрлар, «Америка обрўсига путур етказувчи ғоялардир».

Керри суҳбат чоғида бирон кишининг номини тилга олмаган бўлса-да, телеканалнинг тахминича, давлат котиби республикачилардан икки номзод — миллиардер Дональд Трамп ва Техас штатидан сенатор Тед Крузнинг фикрларини танқид қилган.

Бундан аввал, Дональд Трамп Америка мусулмонлари террорчиларнинг ҳужумларини олдини олиш учун етарли фаоллик кўрсатмаяпти, деган фикрни билдириб ўтган эди.