Таиланднинг Аюттҳая вилоятида содир бўлган мудҳиш йўл-транспорт ҳодисаси натижасида 40 киши жабрланган, улар орасида хорижликлар ҳам бор. Бу ҳақда, ТАСС агентлиги маҳаллий полицияга таянган ҳолда хабар қилмоқда.

Ҳуқуқ-тартибот идоралари томонидан маълум қилинишича, Бангкокдан мамлакат шимолидаги Чиангмай шаҳрига келаётган автобус, ҳайдовчи бошқарувни йўқотгач, йўлдан чиқиб кетиб автобус бекатига урилган. Хабарларга қараганда, ҳодиса вақтида кучли ёмғир ёғаётган бўлган.

Йўловчилардан 40 нафарига тиббий ёрдам кўрсатилган, қурбонлар йўқ. Уларнинг аксари маҳаллий фуқаролар экани айтилган. Ҳозирча ҳодисада жабр кўрган хорижликлар қайси мамлакат фуқаролари эканига ойдинлик киритилмаган.

Айтиш жоизки, Таиланд йўлларидаги хавфсизлик даражаси анча ачинарли ҳолатда. Статистик маълумотларга кўра, 2015 йили қироллик ҳудудида юз берган ЙТҲларда 2315 киши ҳалок бўлган, 152 мингдан ортиқ инсон жароҳатланган.