Япониянинг шимолий ороли Ҳоккайдо полицияси 8 нафар якудза жангчиларини қўлга олди. Уларнинг орасида мамлакатдаги йирик "Ямагути-гуми" синдикатига мансуб маҳаллий жиноий гуруҳ бошлиғи - Ясунори Китагаву ҳам бор.

Ҳибсга олинганларнинг барчаси 18 март куни "Ямагути-гуми" тўдасидан рақиб "Кобэ Ямагути-гуми" гуруҳига ўтган сафдошларининг уйига ҳужум қилмоқчи бўлишганди. Полиция бундан хабар топиб, жиноятнинг олдини олди.

Бу "Ямагути-гуми" ва ундан ажралиб чиққан тўданинг ўтган йил августидан буён давом этиб келаётган навбатдаги зиддиятидир. У Япониянинг 47 префектурасидан 10тасини қамраб олган. Шу кунга қадар 20дан ортиқ қарама-қаршиликлар ва ҳужумлар қайд этилган. Жумладан, "Ямагути-гуми"нинг таянч бўлимларидан бирига ёқилғи аралашмаси бўлган шиша идиш ташлаб кетилган, бунинг натижасида бинонинг биринчи қавати бутунлай ёниб кетган.

Ажралиб чиққан "Кобэ ямагути-гуми" гуруҳи 6 минг ҳарбийдан иборат кучга эга.

"Ямагути-гуми"нинг сафи эса бугунги кунга қадар қисқариб, 14 мингдан ортиқ кишини ташкил этади. Шундай бўлса-да, "Ямагути-гуми" Япониядаги энг кучли уюшган жиноятчилик иттифоқилигича қолмоқда.

Полициянинг ҳисобига кўра, жами профессионал якудзаларнинг 46 фоизи "Ямагути-гуми"га мансуб. Бу ташкилот хусусий компаниялар кўрининишида деярли қонун доирасида ҳаракат қилади.