Egypt Air авиакомпаниясига тегишли А320 самолётини Александриядан Қоҳирага учиш вақтида гаровга олган ва Кипрдаги Ларнака аэропортига қўндирган шахс самолётга ёқилғи қуйишни, шундан сўнг Туркия томон учишни талаб қилди. Бу ҳақда Sky News Arabia хабар берган.

Бундан олдин, Миср самолётини олиб қочган шахс учувчидан Истанбулга учишни талаб қилгани, лекин учувчи ёқилғи етишмаслиги туфайли самолётни Кипрдаги Ларнака аэропортига қўндиргани ҳақида хабар берилганди.

Бу воқеа давомида аввалига самолётни Искандария ва Атланта университетлари профессори Иброҳим Самаҳа олиб қочгани ҳақида айтилди. Кейинроқ адашув юз бергани маълум бўлиб, авиақароқчининг исми шарифи Сайф ад-Дин Мустафо экани аниқланди.

Самаҳанинг ўзи айбловларни рад қилиб, бортни бошқа йўловчилар билан бирга тарк этганини билдирди. Унинг рафиқаси ҳам эри жиноятга алоқадор эмаслигини тасдиқлади.