Латвия ҳукумати Sputnik агентлигига интернет ресурсининг .lv домен ҳудудида ёпилиши тўғрисида расмий огоҳлантириш мактубини юборган. Бу ҳақда Sputnik матбуот хизмати хабар тарқатган.

Домен номларини рўйхатдан ўтказувчи ташкилот юборган расмий мактубга кўра, sputniknews.lv номини рўйхатга олиш ЕИ Кенгаши қарори бандларини бузиш ҳисобланади.

"Латвия ташқи ишлар вазирлигининг маълум қилишича, гап ЕИ Кенгашининг Украина мустақиллиги, ҳудудий яхлитлиги ва суверенитетига таҳдидларни чеклаш чоралари тўғрисидаги қарори ҳақида бормоқда", - дейилади матбуот хизмати хабарномасида. Акс ҳолда, жиноий иш қўзғатилиши мумкинлиги айтилган.

Sputnik бош муҳаррири Маргарита Симоньяннинг ишонч билдиришича, "Sputnik агентлигининг латиш тилидаги хизмати Латвия ва ЕИ қонунчилигининг биронта бандини бузмаган".

".lv домен ҳудудида ресурснинг ёпилиши Латвия ҳукуматининг бевосита цензурасини билдиради. Шу билан биргаликда, Латвия раҳбарияти ОАВининг ахборот тўплаш ва тарқатиш бўйича ҳуқуқини поймол этмоқда", - деган Маргарита Симоньян.

Sputnik (sputniknews.com) – ўнлаб давлатларда мултимедиа ахборот манбалари ва радиосига эга янгиликлар агентлиги ҳисобланади. Sputnik агентлиги 30дан ортиқ тилда фаолият юритувчи сайтлар, аналогли ва рақамли радиодастурлар, мобил илова ҳамда ижтимоий тармоқларда саҳифаларига эга. Sputnik агентлигининг янгиликлар тасмаси инглиз, араб, испан ва хитой тилларида чиқиб туради.