“Барселона” ҳужумчиси Лионель Месси Барселонада минг квадрат метр майдонга эга ресторан очади. Regio7 нашрининг маълум қилишича, ресторан Bellavista del Jardin del Norte (Шимолий боғнинг гўзал кўриниши) деб номланади.

Футболчи билан бирга ресторан эгалари унинг катта акаси Родриго Месси ва таниқли рестораторлар ака-ука Иглесиаслар бўлади. Ресторан Enric Granados, 86 манзили бўйича жойлашиб, кичик шаҳарча кўринишида қурилади. Бу ерда майдон, боғлар, киосклар, барлар барпо этилади. Таъкидланишича, ўзига хос услубда безаладиган ҳар бир залда турли ошхона таомларидан тановул қилиб кўриш мумкин бўлади. Ресторан эгалари ошпазлар сифатида Мишлен юлдузлари билан тақдирланган ошпазларни таклиф қилишмоқчи.

Ресторанда кино ва футбол намойишларини кўриш, видеоўйинлар ўйнаш, кутубхонада китоблар ўқиш ва дегустация ўтказиш мумкин бўлади. Унинг ҳудудида дискотекалар ташкил қилинади. Бундан ташқари, бу ерда меҳмонлар футболчи мукофотларининг нусхаларини кўришлари мумкин бўлади.

Месси ўзининг асосий фаолияти билан бирга тадбиркорлик билан шуғулланаётган ягона \таниқли шахс эмас. Мисол учун, январда Travel and Leisure нашри юлдузларга тегишли бўлган меҳмонхоналар рўйхатини чоп этди. Рўйхатдан теннисчи Энди Маррей, режиссёр Фрэнсис Форд Коппола, актёрлар Хью Жекман ва Роберт Де Ниро ва замонамизнинг бошқа кўплаб юлдузлари ўрин олди.