Хитойнинг Anbang Insurance суғурта гуруҳи бошчилигидаги консорциуми Американинг Starwood Hotels & Resorts Worldwide меҳмонхоналар тармоғи акцияларини 14 миллиард долларга сотиб олиш таклифини билдирди.

China Daily электрон нашрининг хабар беришича, бу 13,6 миллиард долларни ташкил этган Marriott International меҳмонхонасининг таклифидан юқори ҳисобланади.

Бугунги кунда компаниянинг ҳуқуқ ва молия масалаҳатчилари Anbang`нинг таклифини ўрганиб чиқишмоқда, унинг акция баҳоси 82,75 долларни, Marriott`ники эса 79,53 долларни ташкил этади. Агар бу борада келишувга эришилса, у Хитой компанияларининг Америка бозоридаги энг йирик битими ҳисобланади. Anbang`дан ташқари консорциумга J.C. Flowers & Co и Primavera Capital киради.

Marriott компанияси Starwood билан 2015 йилнинг ноябридан музокаралар олиб бораётган эди. 21 март куни компанияларнинг бирлашиш ҳақидаги келишувга эришгани маълум қилинганди. Бу икки компаниянинг бирлашуви натижасида дунёда энг йирик меҳмонхоналар тизими пайдо бўлар, у 100дан ортиқ давлатлардаги 5,5 минг меҳмонхонани ўз ичига олиши эҳтимоли бор эди. Бироқ Anbang`нинг контртаклифи сабабли бу келишув бекор қилиниши мумкин.

Starwood Hotels & Resorts Worldwide компанияси ўнлаб меҳмонхоналар брендига эга: St. Regis, The Luxury Collection, W, Westin, Le Mridien, Sheraton, Tribute Portfolio, Four Points by Sheraton, Aloft, Element. Starwoodга 1,2 мингдан ортиқ турли объектлар мансуб бўлиб, уларга меҳмонхонлар ва дам олиш масканлари киради, шуларнинг ярми Шимолий Америкада жойлашган. Компанияда тахмимнан 180 минг ходим фаолият юритади.

Anbang Insurance Хитойнинг энг йирик суғурта гуруҳларидан бири ҳисобланади. Компания маълумотларига кўра, унинг активларининг умумий қиймати 1,65 триллион юанни (250 миллиард доллар атрофида) ташкил этади.