Франция президенти Франсуа Олланд Франция спорт ва жисмоний ривожланиш миллий институтига ташрифида Франция мамлакатга футбол бўйича 2016 йилги Европа чемпионати вақтида ташриф буюрадиган барча мухлисларнинг максимал хавфсизлигини таъминлашини айтди.

"Хавфсизлик даражаси максимал бўлади. Францияга июнда келишга қарор қиладиганларнинг хавфсизлигини таъминлаш бизнинг давлат сифатидаги бурчимиздир ва биз бу масалада ҳеч қандай муросага бормаймиз. Биз 7 млн га яқин сайёҳни кутмоқдамиз, улардан 2,5 млни ўйинларга ташриф буюради, яна 5 млни мусобақа ўтадиган шаҳарларда жойлашади.

Евро-2016 доирасидаги барча режалаштирилган тадбирлар максимал даражадаги хавфсизлик билан ўтказилади. Биз террорчилар босими ва уларнинг таҳдидлари сабабли ҳеч қачон мусобақанинг кўчирилиши ёки бекор қилинишини мўлжалламаганмиз", деб Олланднинг айтган сўзларини келтирмоқда L'Equipe нашри.

"Биз Европа чемпионатида фан-зоналаримизга келмоқчи бўлганларни мамнуният билан кутиб оламиз, бироқ шу билан бирга мухлислардан хавфсизликни таъминлаш учун зарур бўлган, белгиланган қоидаларга амал қилишларини талаб қиламиз", деб қўшимча қилди Олланд.

Франция бош вазири Мануэль Вальс чемпионат вақтида мухлислар учун мўлжалланган зоналарда вазият хавфсиз бўлишини таъкидлади.

Аввалроқ Олланд 29 мартда Франция ва Россия миллий терма жамоалари ўртасида ўтадиган ўртоқлик учрашувига келмаслиги маълум қилинганди. Париждаги "Стад де Франс" майдонида ўтадиган учрашув Тошкент вақти билан 00.00 да бошланади.