Испаниянинг Corviam Construccion SA компанияси 2016 йил декабригача "Тошкент-Ўш" (А-373) автомобиль йўлининг "Қамчиқ" довонидаги қисмини реконструкциялашни якунлайди, деб хабар бермоқда "Ўзавтойўл" АК вакили.

Манбанинг айтишича, реконструкция ишлари ҳудуднинг мураккаб иқлим ва гидрогеологик хусусиятлари билан боғлиқ бўлиб, шу сабабли лойиҳа муддатлари кўчирилди.

"Йўлни реконструкциялаш ишларини декабрга якунлаш режалаштирилмоқда ва қишгача бизда Қамчиқ орқали янги йўл бўлади", деб айтди манба.

2012 йил июлида Corviam Construccion SA бошчилигидаги консорциум Ўзбекистон ҳукумати билан "Қамчиқ" довонидан ўтувчи йўлни рекнструкция қилиш бўйича 139 млн долларлик шартнома имзолаганди. Шартнома доирасида консорциум 58 км лик йўлнинг реконструкциясини амалга оширади ва 2 полосали асфальт қопламани 4 полосали цемент-бетон қопламага алмаштиради. Ушбу шартномани дастлаб 2014 йилнинг якунигача амалга ошириш мўлжалланганди. Консорциум таркибига испан компаниясидан ташқари, Ўзбекистоннинг "Электртармоққурилиш" корхонаси ҳам кирган.

Умумий қиймати 211,3 млн долларлик лойиҳада йўлнинг 74 км (йўлнинг 116-190 км лари) узунликдаги қисмида 2 полосали асфальт қопламани 4 полосали цемент-бетон қопламага алмаштириш кўзда тутилган. 16 км йўл қисмидаги ишларни пудратчилик асосида "Ўзавтойўл" бўлинмалари бажаради. Лойиҳа Осиё тараққиёт банкининг 167,2 млн долларлик кредити ва Ўзбекистон маблағлари ҳисобига молиялаштирилмоқда.