Германиянинг Туркиядаги элчиси Мартин Эрдман 22 мартда Туркия ташқи ишлар вазирлигига немис телевидениесидаги ҳажвий кўрсатув сабабли чақиртирилди Бу ҳақда 28 мартда Der Spiegel журнали ўз манбаларига иқтибос келтирган ҳолда хабар берди.

Extra 3 кўрсатуви ARD телеканалида 17 мартда эфирга узатилган. Унда Туркия президенти Ражаб Тойиб Эрдўған сиёсатига бағишланган ҳажвий видеоролик ҳам кўрсатилган.

2 дақиқа давом этувчи видеоролик муаллифлари Эрдўғаннинг "ҳашаматли яшаш истагини" ҳамда матбуот эркинлиги ва мамлакатдаги демократик тамойилларни таҳқирлаши устидан мазаҳ қилганлар. " Эрдўғанга ёқмайдиган нарса ҳақида ёзувчи журналист, эртасигаёқ панжара ортига тушади", дейилмоқда роликда.

Der Spiegel Туркия ташқи ишлар вазирлиги ходимларининг Германия элчиси билан суҳбати тафсилотларини келтирмаган. Нашр фақатгина суҳбат узоқ давом этганини қайд қилиб ўтган.