Республикачилардан АҚШ президентлиги учун даъвогарлардан бири Дональд Трампнинг собиқ маслаҳатчиси "Трампнинг ўз сайловолди кампаниясидаги муваффақиятларидан ҳайратда эканини" билдирган. Унинг айтишича, Трамп аслида президент бўлишни хаёлига ҳам келтирмаганди. Бу ҳақда собиқ сиёсий маслаҳатчи New Daily News газетасига маълум қилган. 

Трампнинг стратегик масалалар бўйича маслаҳатчиси бўлиб ишлаган сиёсатшунос Стефани Цегильскининг айтишича, Республикачилар номзоди дастлаб “ўзини бошқаларга қарши номзод сифатида ҳис этган ва кампания етакчиси бўлишга тайёр бўлмаган”.

"Фикримча, Америка президентлиги учун ташвиқот жараёнида бундай ютуққа эришиши, Трампнинг тушига ҳам кирмаган бўлса керак. Бундан ташқари, унинг ўзи президент бўлишни жуда ҳоҳлаётганига ишонмайман", - деган Цегильски.

Нашрнинг ёзишича, "Трамп ҳеч қачон номзод бўлишни истамаган, аммо ғурури унга тўхташга йўл қўймаяпти". Кегильскининг таъкидлашича, Дональд Трамп ҳозир ҳам "Оқ уйнинг янги раҳбари бўлишни жуда хоҳлаётгани йўқ".

Ҳозирда, Трампнинг собиқ маслаҳатчиси республикачиларнинг миллиардерни президентлик пойгасидан чиқариб юбориш мақсадида ташкил этилган Super PAC гуруҳи аъзосидир. Цегильскининг айтишича, у 2015 йили Трамп номзодини, унинг тўғрисўз ва ишбилармонлиги сабаб ёқтириб қолган. Аммо, Трампнинг сўнгги чиқиши, собиқ маслаҳатчи сабр косасини тўлдирган.

Миллиардер Покистондаги хунрезликларга муносабатини билдирар экан, твиттердаги саҳифасида шундай ёзганди: "Радикаллар яна бир қўпорувчилик содир этишди. Бу сафар покистонлик христиан аёллар ва болалар уларнинг нишонига айланди. Камида 67 киши ҳалок бўлиб, 400 нафари жароҳатланди. Ва фақат мен бу муаммога барҳам бера оладиган ягона кишиман".

Цегильски, Трампнинг бу сўзларини "шунчаки кулгили" ва "ёш болаларга хос", деб баҳолаган.

Сиёсатчининг матбуот котиби ўз навбатида, Цегильски сўзларини изоҳлар экан, Стефани "Трампни ҳам, унинг сайловолди кампанияси"ни ҳам билмайди, аксинча "шунчаки ўткинчи шон-шуҳрат қозонишга интилган", деб таърифлади.