Қозоғистон раҳбарининг топшириғига кўра, шу йилнинг 1 сентябридан умумтаълим мактабларида 1-синф ўқувчилари учун беш кунлик ўқиш тартиби кучга киради.

"Биринчи синф ўқувчилари 1 сентябрдан 1 июнга қадар таълим оладилар", деб хабар беради Қозоғистон республикаси Фан ва таълим вазирлигининг матбуоти хизмати.

Аввалига беш кунлик ўқиш тартибига ўтиш 2017 йилдан бўлиши режалаштирилган эди, лекин эндиликда бу тартиб шу йилнинг ўзида жорий этиладиган бўлди.

Кейинчалик 2017 йилда иккинчи, бешинчи, еттинчи ва тўққизинчи синфлар ҳам беш кунлик ўқиш тартибига ўтади. 2018 йилда эса қолган барча синфлар ҳам янги тартибга мувофиқ таълим оладилар.

Матбуот хизматида маълум қилишларича, беш кунлик таълимга ўтиш ўқув дастурининг янгиланиши билан боғлиқ. Янги ўқув дастурлари Назарбаев Заковат Мактаби дастурларига асосланган.

Таълим дастурлари жаҳоннинг энг илғор тажрибаларига мувофиқ ишлаб чиқилади.

Қозоғистон бош вазир ўринбосари Дариға Назарбоеванинг таъкидлашича, мактаб юкламаси болалар соғлиғига катта таъсир кўрсатмоқда ва улар ўзларини тиклаб олишлари учун бир кун камлик қилмоқда.

"Биз шанба куни болаларнинг ҳар томонлама ривожланишлари учун имконият яратамиз, масалан, бу куни улар тил ўрганиш курсларига ёки спорт секцияларига боришлари мумкин. Яна бир жиҳати, биз асосий тарбияни оилада оламиз, шанба куни болалар яқинлари билан мулоқот қилиб, оилавий анъаналарда иштирок этишлари мумкин", - деди у.