Бир неча йил муқаддам, АҚШнинг Янги Орлеан шаҳрида содир этилган жиноят айбдорлари устидан суд ҳукми эълон қилинди. Шаҳарда бўлиб ўтаётган парад иштирокчиларини ўққа тутган ака-ука умрининг охиригача қамоқда ўтирадиган бўлди. Бу ҳақда Луизиана штати прокуратураси маълум қилди.

Мудҳиш воқеада 20 киши, шу жумладан оналар ва болалар тан жароҳати олган эди.

Гап 4 нафар қоратанли ака-укалардан 2 нафари, 31 ёшли Трэвис Скотт ва унинг 22 ёшли укаси Акин ҳақида бормоқда. Улар ўғрилик, қотилликлар ва гиёҳванд моддаларнинг ноқонуний савдоси билан шуғулланиб келган жиноий гуруҳ аъзоси бўлишган. Ака-укага ўқ узиш бандидан ташқари қурол ҳамда гиёҳванд моддаларни ноқонуний сақлаш айблови ҳам қўйилган. Улар 2015 йил кузида айбига иқрор бўлишганди.

Ушбу жиноий иш бўйича Скоттлар оиласининг яна икки вакили ҳам судда жавоб берди. 27 ёшли Шон ва 24 ёшли Стэнли айни жиноий тўда аъзоси бўлишган. Америка суди уларнинг ҳар бирини 40 йиллик қамоқ жазосига маҳкум этди.

Оналар куни муносабати билан ўтказилган параддаги отишма 2013 йил майида содир бўлган эди. Кузатув камералари эса, ака-ука Скоттлардан бирининг ўқ узаётганини қайд этгани жиноятнинг фош бўлишида ёрдам берган.