Москвада ИШИД террорчилик гуруҳи билан алоқаси борликда гумон қилинаётган 20 га яқин киши ҳибсга олинди. Бу ҳақда 30 мартда ҳуқуқ-тартибот муассасаларидаги манба РИА “Новости” ахборот агентлигига маълум қилди.

Дастлабки маълумотларга кўра, ҳибсга олинганлар Москвада жангариликка ёллаш билан шуғулланган. Айни вақтда агентлик бу хабарнинг расмий тасдиғига эга эмас.

"Интерфакс" маълумотларига кўра, ҳибсга олинганлар Туркия фуқаролари бўлиб, уларнинг ёнидан қалбаки ҳужжатлар топилган. Айни вақтда уларнинг халқаро экстремистик ва террорчилик ташкилотларига алоқаси борлиги текширилмоқда.

Махсус хизматлар маълумотларига кўра, ИШИДда Россия ва Европада терактлар уюштиришга тайёргарлик билан шуғулланувчи махсус бўлим мавжуд бўлиб, унга "Бир қўлли" лақабига эга Ахмед Четаев бошчилик қилади. Бу бўлим асосан шимолий кавказликлардан иборат.