2002 йилда адабиёт йўналишида Нобель мукофотига сазовор бўлган венгриялик ёзувчи Имре Кертес 86 ёшида узоқ давом этган хасталикдан сўнг вафот этди. Бу ҳақда Рейтер агентлиги хабар тарқатган.

Кертес келиб чиқишига кўра венгр яҳудийси бўлиб, Будапештда туғилганди. У 1944 йилдан 1945 йилгача Освенцим ва Бухенвальд лагерларида маҳбус бўлган.

Унинг биринчи романи бўлмиш "Тақдирдан холи" асари 1975 йилда нашр этилган. Ундаги воқеалар концлагерга тушиб қолган болакай тилидан ҳикоя қилинади. Бу асар ўз даврида яхши кутиб олинмаган, шундан кейин Кертес узоқ вақт давомида немис тили таржимони сифатида фаолият кўрсатган.

1988 йилда у "Фиаско" номли яна бир асарини нашрдан чиқарди. Унда ҳам лагер ҳаётини ҳикоя қилиш давом этади. Трилогиянинг учинчиси "Туғилмаган бола учун дуо" номи остида 1990 йилда эълон қилинади.

Ўтган асрнинг 90-йилларидагина Кертесни хорижда ҳам ёзувчи сифатида била бошлашади ва унинг асарлари инглиз тилига ўгирилади.