Forbes журналининг Украинада чоп этилувчи нашри Украинанинг энг бадавлат одамлари рейтингини тузиб чиқди. Бу рейтингнинг етакчиси аввалгидек Ринат Ахметов бўлиб қолмоқда, унинг 2015 йилдаги бойлиги 2 баробарга – 4,6 млрд доллардан 2,3 млрд долларгача камайиб кетган. Нашрнинг таъкидлашича, бунга Донбассдаги уруш эмас, балки хом ашёларга, жумладан темир рудаси ва металларга нархларнинг қулаши асосий сабаб бўлган. Бундан ташқари, Ахметов империяси катта миқдорда кредит олган, бу ҳам олигархнинг давлатига салбий таъсир кўрсатди.

2-ўринни Днепропетровск вилоятининг собиқ губернатори Игорь Коломойский эгаллади, унинг давлати бир йил давомида 100 млн долларга камайиб, 1,3 млрд долларни ташкил қилган. Нашрнинг таъкидлашича, Коломойскийнинг давлатига унинг губернатор лавозимидан кетиши ҳамда "Укрнафта"даги можаро таъсир кўрсатган.

3-ўринни Коломойскийнинг "Приват" гуруҳи бўйича ҳамкори Геннадий Боголюбов эгалламоқда. Унинг 2015 йилдаги бойлиги ўзгаришсиз – 1,3 млрд долларлигича қолган.

Украина бойларининг етакчи бешталигига шунингдек Виктор Пинчук ва Юрий Косюк ҳам киритилди. Асосий активлари металлургия ва медиавоситаларга тўғри келувчи Пинчукнинг 2015 йил натижаларига кўра бойлиги 1,2 млрд долларни ташкил қилди. "Мироновский хлебопродукт" компаниси президенти ва бошқарув раиси Косюкнинг бойлиги эса 1 млрд долларга баҳоланган.

Аввалроқ Украина президенти Пётр Порошенко 2015 йил давомида ўз бойлигини 100 млн долларга кўпайтиргани маълум қилинганди.