Жиззахда IX Инновацион ғоялар, технологиялар ва лойиҳалар ҳудудий ярмаркаси ўтказилди. Бу ҳақда “ЎзА” хабар бермоқда.

Ўзбекистон Республикаси Вазирлар Маҳкамаси ҳузуридаги Фан ва технологияларни ривожлантиришни мувофиқлаштириш қўмитаси, вилоят ҳокимлиги, вилоят ҳудудий инновация фаолияти ва технологиялар трансфери маркази ҳамкорлигида ташкил этилган ярмаркада ҳудуддаги илмий-ишлаб чиқариш марказлари, олий ўқув юртлари, “Жиззах” махсус индустриал зонасидаги корхоналар томонидан 100 дан ортиқ инновацион технология ва ишланмалар намойиш этилди.

Кўргазмадаги энергетика, энергия тежамкор, қайта тикланувчи энергиядан фойдаланиш, ахборотлаштириш ва ахборот технологиялари, қишлоқ хўжалиги, биотехнология, атроф-муҳит муҳофазаси, саноат технологиялари ва нанотехнологиялар экспертлар ҳамда ишлаб чиқарувчиларда катта қизиқиш уйғотди.

– Ярмаркада институтимиз ёш олимлари ва тадқиқотчилари йўлсозлик, транспорт, қурилиш соҳасидаги янги технология ва ишланмалари билан иштирок этди, – дейди Жиззах политехника институти ректори Эргаш Солиев. – Ушбу кўргазма тадқиқотчиларимиз учун республика ярмаркаси олдидан ўзига хос синов вазифасини ўтамоқда.

Тадбир давомида саноат корхоналари ва ташкилотлар, кичик бизнес ва хусусий тадбиркорлик субъектлари билан янги технология, лойиҳа ва ишланмаларни харид қилиш, сотиш юзасидан кўплаб шартномалар имзоланди.