31 март куни Вашингтонда иш бошлайдиган Ядро хавфсизлиги саммити арафасида, АҚШ президенти Барак Обама Россияни ўрта ва қисқа масофаларга уча оладиган ракеталар тўғрисидаги шартнома бандларига тўлиқ амал қилишга чақирди. Бу ҳақда Америка етакчиси The Washington Post газетасидаги мақоласида фикр юритган.

Унда Обама ушбу шартнома бузилаётган ҳолатларга эътибор қаратиб, Вашингтон Кремль маъмуриятини ўз мажбуриятларини тўлиқ бажаришга ундашини таъкидлаган.

Америка етакчиси ядро қуроллари захирасини қисқартириш зарурлигини алоҳида қайд этар экан, бу борада Россия ва АҚШ ўртасида икки томонлама музокаралар ўтказиш таклифини билдирган.

Обаманинг эътирофига кўра, Москва ва Вашингтон стратегик ҳужум қуролларини қисқартириш ва чеклаш бўйича зиммасидаги мажбуриятларини бажариб келаётгани боис, 2018 йилда ушбу мамлакатлар ихтиёридаги жанговар ядрокаллаклари сони 1950 йилдан бери энг паст кўрсаткичга етади.

2015 йил декабрь ойида, АҚШ Россия томонидан ўрта ва қисқа масофаларга учувчи ракеталарни йўқ қилиш тўғрисидаги шартнома бандлари бузилаётганини рўкач қилиб, Москвага қарши санкциялар тайёрлаётгани ошкор бўлганди.

Умуман, сўнгги йилларда Россия ва АҚШ мазкур шартнома бандларини бузишда, бир-бирини айблаб келади. Вашингтон, “Искандер-М” ерусти мажмуасининг Р-500 қанотли ракетаси ҳамда янги стратегик РС-26 («Рубеж») ракетасига нисбатан ўз даъволарини илгари сурмоқда.

Москва томони эса 1990 йиллар охиридан бошлаб, АҚШда ракеталарга қарши мудофаа тизими учун нишон ракеталар ишлаб чиқарилаётганидан қайғурмоқда. Россиянинг фикрича, бу ускуналар аслида жанговар қурол ўрнатилмаган тўлақонли ракеталардир. Шунингдек, Руминияда Tomahawk ракеталарини учириш имконини берувчи Standard SM-3 мажмуаларининг ўрнатилиши Москва хавотирига сабаб бўлмоқда.