Сурия фунти 5 йил ичидаги мутлақ минимум қийматга қадрсизланиб кетди, деб хабар бермоқда ABC News телеканали.

Сурия валютаси бир АҚШ доллари учун 530 фунт қийматида сотилмоқда. Сурия фунтининг навбатдаги пасайиши Россия Суриядан асосий кучларини олиб чиқишини маълум қилгандан кейин бошланганди.

Сурияда 2011 йилда фуқаролик уруши бошланганда бир доллар бор-йўғи 47 сурия фунти турган.

Сурия бош вазири Ваил ал-Халқий 31 мартда парламентдаги нутқи давомида Сурия иқтисодиёти "шафқатсиз урушнинг" объекти бўлганини таъкидлаб ўтди. У ҳукумат миллий валюта курсининг пасайишини тўхтатиш устида иш олиб бораётганини айтди.

Ал-Халқий, шунингдек, расмийлар кўчаларда катта миқдордаги нақд пулга эга одамларни ушлаётганларини маълум қилди. Бу шахслар "қора бозорда" валюта олиб-сотарлигида айбланмоқдалар.