Туркияда россиялик учувчининг (2015 йил ноябрида уриб туширилган Су-24 учувчиси) қотиллигида гумон қилинган Алпарслон Челик қўлга олинган. Бу ҳақда Hurriyet хабар тарқатди.

Челик 30 март куни кечаси Измир шаҳридаги ресторанлардан бирида қуролдошлари билан бирга ўтирганида қўлга олинган. Улар Челикнинг Суриядан қайтишини нишонлашаётган бўлган. Ресторанда жами 15 киши ҳибс қилинган. Қайд этилишича, Челик сўроқ қилинмоқда.

2015 йилнинг 24 ноябрида Сурияда Россия авиагуруҳи таркибидаги Су-24 самолёти Туркия қирувчи самолёти томонидан туркларнинг ҳаво кенглигини бузиб ўтганликда айбланиб, уриб туширилди. Су-24 учувчилари катапульта қилинган, лекин улардан бири Олег Пешков ҳаводалигида ердан туриб отиб ташланган. Иккинчи учувчи, штурман Константин Мурахтин эса қутқариб қолинган.

Кейинроқ, 2015 йилнинг 27 декабрида Челик россиялик учувчининг отиб ташланишида қатнашганини тан олди.

Шундан сўнг, Россия ТИВ Туркиядан Су-24 учувчиси отиб ўлдирилишига алоқадор бўлган Алпарслон Челикни зудлик билан қўлга олишни талаб қилди.