Windows 10 операцион тизими ўрнатилган компьютерлар сони 270 млн донага етди. Бу ҳақда Microsoft вице-президенти, Windows&Devices бўлими бошлиғи Терри Майерсон Microsoft Build 2016 конференцияси вақтида маълум қилган.

«Windows 10 операцион тизими Windows тарихидаги энг муваффақиятли янги тизим бўлди. Тизим ишга тушганидан бошлаб бугунги кунгача ундан фойдаланишни бошлаган компьютерлар сони 270 млн донага етди. Бу шу вақт мобайнида Windows 7 тизими янги чиққанида ўрнатилганидан 145 фоизга кўпроқ деганидир», - дея таъкидлаб ўтган Майерсон.

Майерсоннинг аниқлик киритишича, Windows 10 ишга туширилганидан бошлаб ҳозиргача фойдаланувчилар 75 млрд соат мобайнида ушбу тизим хизматларидан фойдаланишган.