The Wall Street Journal нашри мақоласида ёзилишича, Туркия президенти Ражаб Тойиб ЭрдўғонҒарб билан муносабатларини яхшилаш ва мамлакати обрўсини тиклаш учун Вашингтонга ташриф буюрди.

Мақолада қайд этилишича, туркияликлар етакчисининг Вашингтонга ташрифидан асосий мақсад расман ядро хавфсизлигига оид саммитда иштирок этиш бўлсада аслида унинг вазифалари кенг қамровлидир.

Айни пайтда Туркия ҳукуматининг курдларни таъқиб қилиши ОАВини чеклаб қўйиши ва бошқа бир қанча сиёсати туфайли Ғарб билан алоқалари ҳавас қилгудек эмас. Вашингтон Анқарани доим муаммолар чиқариб юрувчи ҳамкор сифатида кўрмоқда, Эрдўғон эса вазиятни ўнглаши лозим.

Сиёсатчиларнинг фикрича, турк етакчиси ўзининг қаттиққўл сиёсатини оқлашга уриниб кўради. Аммо АҚШнинг фикрини ўзгартириш ўта мушкул иш.

WSJ нашрининг ёзишича, айни чоғда турк ОАВи Америкага қарши ташвиқот ишлари билан машғул. Маҳаллий матбуот АҚШни Эрдўғонни ағдариш, Анқара манфаатларини писанд қилмаслик ва ҳатто Истанбулдаги терактларга алоқадорликда айбламоқда.

Мақола муаллифларининг ёзишича, гарчи, Туркиянинг қулай геосиёсий жойлашуви, Европага нисбатан ўз шартларини илгари суришда Анқарага қўл келаётган бўлсада, Америка билан бундай йўл тутиш фойда бермайди. Эрдўғон ўз сиёсатини ўзгартирмас экан, Вашингтон бир пайтлар минтақадаги йирик ҳамкорига кўз юмишда давом этади.

Бундан аввал, Оқ уй матбуот котиби Жош Эрнест, президент Барак Обама Эрдўғон билан учрашишга имкон топишга ҳаракат қилишини айтган эди. Олдинроқ, икки давлат раҳбарлари ўртасида мулоқот бўлмаслиги хабар қилинганди.