Хитойнинг Куинан шаҳрида XXXI ёзги Олимпиада ўйинларининг йўлланмалари учун ўтказилаётган Осиё ва Океания қўшма лицензион чемпионатида Ёдгорой Мирзаева -51 кг вазн тоифасида Олимпиада йўлланмасини қўлга киритди, дея хабар бермоқда Миллий олимпия Қўмитаси ахборот хизмати.

Манбанинг ёзишича, Мирзаева ярим финалда Хитой Тайпейи вакили Лин Ю Тиндан 2:1 ҳисобида устун келиб, “Рио-2016” ўйинларига йўлланма олган. Шу тариқа, Ёдгорой Мирзаева ўзбекистонлик хотин-қизлар орасида биринчи бўлиб бокс бўйича Олимпиада ўйинларига йўлланмани қўлга киритди.

Бироз аввал Ҳасанбой Дўсматовни (-49 кг) ярим финалда мўғилистонлик Ган-Эрден Ганхуягни 3:0 ҳисобида мағлуб этиб, ҳал қилувчи финалга чиқиш билан бирга “Рио-2016” ўйинларига йўлланма олганлиги ҳақида хабар берилганди.

Эслатиб ўтамиз, бугун куннинг иккинчи ярмида яна беш нафар ўзбекистонлик боксчи Олимпиада ўйинларининг йўлланмаси учун рингга кўтарилади.