Хитойнинг Куинан шаҳрида бокс бўйича XXXI ёзги Олимпиада ўйинларининг йўлланмалари учун ўтказилаётган Осиё ва Океания қўшма лицензион чемпионатида энг енгил вазн тоифасида ўтказилган финал жангида ўзбекистонлик Ҳасанбой Дўсматов мусобақанинг олтин медалига ҳам сазовор бўлди.

Миллий олимпия қўмитаси ахборот хизмати хабарига кўра, Дўсматов финалда филиппинлик Роген Ладонни мағлубиятга учратган ва «Рио-2016» ўйинларининг йўлланмаси билан бирга ушбу мусобақа бош совринини ҳам ўзиники қилиб олган.

Таъкидлаш жоизки, филиппинлик чарм қўлқоп устаси ушбу вазн тоифасида биринчи рақам остида, Ҳасанбой Дўсматов эса иккинчи рақам остида қайд этилган эди.

Бугун бўлиб ўтадиган финал баҳсларида, шунингдек, Шаҳобиддин Зоиров (-52 кг) хитойлик Жиангуан Ху билан, Шахрам Ғиясов (-69 кг) таиландлик Сайлом Арде билан, Элшод Расулов (-81 кг) эса қозоғистонлик Адилбек Ниязимбетов билан олтин медаллар учун рингга кўтарилишади.

2 апрель куни ўтказиладиган финал жангларида Ёдгорой Мирзаева (-51 кг) хитойлик Канкан Рен билан, Рустам Тўлаганов (-91 кг) хитойлик Фенгкай Ю билан ва ниҳоят Баҳодир Жалолов (+91 кг) қозоғистонлик Иван Дичко билан баҳс юритади.