Франция ташқи ишлар вазири Жан Марк Эйро Ouest-France нашрига берган интервьюсида жаҳон ҳамжамияти Ироқда йўл қўйган хатоларини Ливияда такрорламаслиги лозимлиги ҳақидаги фикрни илгари сурди.

Франция ташқи ишлар маҳкамаси раҳбари Ливиядаги беқарор вазият юзасидан ўз хавотирларини билдирган.

«Ливиядаги тобора кучайиб бораётган бошбошдоқлик, терроризмнинг тезда ривожланишига замин яратади. Бу ҳол минтақа ва Европага бевосита таҳдид туғдиради. Халқаро ҳамжамият Ироқдаги хатоларига қайта йўл қўймаслиги керак», — деб таъкидлайди Эйро.

У Американинг Ироқ ички ишларига аралашуви минтақадаги вазиятни тубдан издан чиқаргани, бу эса алалоқибат, ИШИДнинг пайдо бўлишига олиб келганини хотирлади.

Франция ташқи ишлар вазири, Ливиянинг янги миллий ҳукуматига ёрдам беришга тайёрлигини изҳор қилган.

«Фаёз Сараж раҳбарлигидаги Ливия ҳукуматига, ҳар қандай, жумладан ҳарбий ёрдам беришга ҳам шай туриш талаб этилади», — деб айтган Эйро.

У Ливияга ҳарбий қўшинларни киритиш имкониятини рад этмаган.

«Барчаси янги ҳукуматга боғлиқ. Сиёсий жараёнларни четлаб ўтган ҳолда, фақат, авиазарбалар ҳақида ўйлаш масаланинг ечими эмас», — деб журналистлар саволига жавоб қайтарган Франция ТИВ раҳбари.