Туркия президенти Ражаб Тойиб Эрдўғоннинг тансоқчилари, давлат раҳбарининг Вашингтонда қилган маърузасига ОАВ ходимларини киритишни истамаган. Бу ҳақда Financial Times хабар берган.

Ядро хавфсизлиги саммитида иштирок этиш учун Вашингтонга келган Эрдўғон, шаҳарнинг Брукинг институтида маъруза қилиши чоғида ушбу воқеа юз берган.

Гувоҳларнинг маълум қилишларича, турк хавфсизлик хизмати Эрдўғонни тинглашни хоҳлаган репортёрларни ўтказмаган. Тансоқчилар Туркия етакчиси ўз маърузасини бошламасданоқ, камида бир мухбирни залдан олиб чиқишга уринган. Институт ходимларининг аралашувидан сўнг, ОАВ ходими маърузага кира олган.

АҚШ президентининг миллий хавфсизлик масалалари бўйича маслаҳатчиси ўринбосари Бен Родс, ҳодиса тафсилотларини билмасада, «мустақил журналистикани ҳурмат қилиши ва қўллаб қувватлашини» айтган.

Нашрнинг ёзишича, Эрдўғон маърузаси чоғида, суриялик курдларни қўллаб-қувватлаётгани учун АҚШни танқид қилган. У шунингдек, ўзининг айрим турк ОАВи билан зиддиятига изоҳ бериб, холис танқидни қабул қилишини, аммо «ғийбатга ва инсон шаъни ерга урилишига қарши» курашаётганини айтган.