Индонезия мудофаа вазири Риамизард Риачуду кўпмақсадли Су-35 русумли ҳарбий самолётларни харид қилиш режаси мавжудлигини тасдиқлади. Бу ҳақдаги шартнома мудофаа вазирининг яқин орада Россияга қилажак сафари чоғида имзоланади.

Индонезия мудофаа вазири Bloomberg агентлигига берган интервьюсида шу ҳақда маълум қилган.

Унинг сўзларига кўра, "гап саккиз ёки ўнта самолёт ҳақида бормоқда".

Бундан аввалроқ, Риамизард Риачуду Индонезияга "қирувчи самолётларнинг эскадрони кераклигини, аммо ҳозирча, шу миқдорда самолёт харид қилинишини" айтганди.

Вазирнинг қайд этишича, "Индонезия нафақат Россиядан, балки АҚШ ва Европадан ҳам ҳарбий техникалар харид қилиш ниятида".

"Биз қайсидир томонни устун қўймоқчи эмасмиз, асосийси бизга ҳарбий самолётлар лозим", деган Индонезия мудофаа вазири.

Қайд этиш керакки, Индонезия армияси Россия қурол-яроғларидан кенг фойдаланади. Мамлакат ҳарбий ҳаво кучлари сафида Су-27 ва Су-30 қирувчи самолётлари бор. Су-35 қирувчилари эса, Американинг эскириб қолган F-5 Tiger самолётлари ўрнини эгаллайди.