Сеулнинг таъкидлашича, Шимолий Корея Жанубий Кореядаги сунъий йўлдош сигналини сўндириб қўйган. Бу ҳақда Жанубий Корея миллий мудофаа вазирлигидаги манбага иқтибос келтирган ҳолда ТАСС ахборот агентлиги хабар бермоқда.

Таъкидланишича, Шимолий Корея шу тариқа GPS навигация сигналини сўндириш учун қурилмани синовдан ўтказган.

Манбанинг маълумотларига кўра, 31 март кечки пайт Жанубий Кореянинг бир қатор ҳудудларида, жумладан Сеул ва Инчхон шаҳарларида ҳамда Канвондо ва Кёнгидо вилоятларида глобал жойлашув тизими – GPS қурилмалари оммавий тарзда носоз ишлаши кузатилган. Мобиль телефонлар, автомобиль ва бошқа транспорт воситаларида навигация ёмон ишлаган.

"Бу авиация ва кемачиликка муайян хавф туғдирди, бироқ бу гал нохуш воқеалар юз бермади", деб айтди манба.

Манба бу ҳолат Сеулда GPS сигналини бир неча бор сўндиришга ҳаракат қилган Пхеньяннинг ҳаракатлари сабабли бўлган, деб ҳисобламоқда.

"Шимолий Корея март ойида Жанубий Кореянинг пойтахт ҳудудида бир неча бор GPS сигналини сўндиришга ҳаракат қилди. Бироқ ҳозирги халақитлар энг кучлиси бўлди ва техника ишида носозликларга олиб келди", деб таъкидламоқда манба.