Дунё янги ядровий аср – хавфли ва аввалдан айтиб бўлмайдиган асрга "қараб кетмоқда". Бундай фикрни 31 мартда АҚШ жамоат ва сиёсат арбоблари билан Карнеги фонди бош қароргоҳидаги учрашувда Қозоғистон президенти Нурсултон Назарбоев билдирди.

Назарбоевнинг айтишича, "21 асрга тинчлик ва глобал ҳамкорликнинг янги даври сифатида умид боғлаган эди", бироқ "янада хавфсизроқ ва барқарор дунёни қуриш учун ноёб тарихий имконият қўлдан чиқарилди". "Дунёга яна хавф таҳдид солмоқда, бу хавфни назар-писанд қилмаслик ярамайди. Бу хавф – глобал миқёсдаги қирғинбарот урушдир", деб айтди Назарбоев.

Қозоғистон президенти 1968 йилда имзоланган ядровий қуролни тарқатмаслик бўйича келишув "ўз вазифасини бажармаётганини", "глобал иштирокчилар ўртасидаги ишончда мисли кўрилмаган инқироз ядровий қуролни қўллашнинг олдини олишга кафолатларнинг таназзулга олиб келаётганини" айтди.

"21 асрнинг энг жиддий муаммоларидан бири ядровий террорчилик ҳамда ядровий ва радиоактив материалларнинг ноқонуний айланмаси ҳисобланади. Дунё "ядровий асрга" қараб кетмоқда. 60 йил аввал буюк олимлар Альберт Эйнштейн ва Бертран Рассел "Инсон зоти йўқ бўлиб кетадими ёки инсоният урушдан воз кечадими?" деган муҳим савол қўйилган манифест билан чиқишганди. Урушларга барҳам бериш – инсониятнинг энг мураккаб вазифаси ҳисобланади. Бироқ унга муқобиллик йўқ", деб таъкидлаб ўтди Назарбоев.

Назарбоев, шунингдек, бу мақсадга эришиш учун "дунёнинг барча етакчиларининг сиёсий иродаси ва барча давлатларнинг саъй-ҳаракатлари бирлаштирилиши зарурлигини" айтди.