Диёрбакирдаги терактни тергов қилиш доирасида Туркияда 9 киши ҳибсга олинди. Бу ҳақда мамлакат хавфсизлик идораларидаги манбаларга иқтибос келтирган ҳолда Reuters ахборот агентлиги хабар берди.

31 мартда кечки пайт террорчилар Диёрбакирдаги автовокзал яқинида йўл четига қўйилган миналаштирилган автомобилни унга полицияларни олиб кетаётган хизмат автобуси яқинлашганда масофадан туриб портлатиб юборган. Ҳужум оқибатида 7 нафар полициячи ҳалок бўлган, 27 киши жароҳат олган.

Портлаш учун жавобгарликни Курдистон ишчи партияси билан алоқадор бўлган "Мудофаа халқ кучлари" гуруҳи ўз зиммасига олган.

Диёрбакир Туркиянинг жанубида, анъанавий тарзда курдлар яшайдиган ҳудудларнинг марказида жойлашган шаҳар.