“Қувноқлар ва зукколар” кўрик-танловининг янги мавсуми очилиши муносабати билан энг сара жамоалар иштирокида концерт фестивали ўтказилади. 6 апрель куни “Истиқлол” санъат саройида бўлиб ўтиши кутилаётган фестивалда “Турон” , “Осмондаги болалар” “Шоввозлар” ва бошқа таниқли жамоалар иштирок этадилар.

Жамоалар таркибида юртимиздаги турли олий таълим муассасаларининг фаол ва қувноқ талабалари, жумладан, Мирзо Улуғбек номидаги Ўзбекистон Миллий университети (“Шоввозлар”) , Тошкент автомобиль йўллари институти (“Осмондаги болалар”) , Ажиниёз номидаги Нукус Давлат педагогика институти (“Турон”) ва бошқа жамоалар қатнашадилар.

Концерт дастурига ташриф буюрувчиларни резидентлар томонидан ижро этиладиган ажойиб ҳазил-мутойибалар, саҳна кўринишлари, миниатюралар, энг сара кулгу дастурлари ва кўнгилочалар томошалар кутмоқда.

Фестивалда ўзбек миллий эстрадаси юлдузлари, актёр-актрисалар ва ҳажвия усталари ҳам қатнашишади. Чипталарни “Истиқлол” санъат саройи кассаларидан топишингиз мумкин.