Дунёдаги энг йирик супермаркетлар тармоғига эгалик қилувчи Американинг Walmart компанияси, Apple ва Samsung компаниялари томонидан ишлаб чиқилган энг сўнгги моделлар нархи арзонлашгани ҳақида эълон қилди. 31 март куни расман сотила бошланган iPhone SE ҳам ушбу рўйхатда бор.

Walmart хабарига кўра, чегирмалар июнь ойи охиригача амал қилади. Улар iPhone 6s ва iPhone 6s Plus, шунингдек, Samsung Galaxy S6 ва S7 смартфонларига жорий қилинади. Apple маҳсулотлари белгиланганидан 100 доллар арзон сотилаётган бўлса, унинг жанубий кореялик рақобатчиси маҳсулотларини оз эмас, кўп эмас нақ 150 доллар кам тўлаб, харид қилиш мумкин.

Алоҳида қайд этиш лозим, чегирмали телефонларни харид қилиш учун AT&T, Verizon ва Sprint компанияларидан бирига мижоз бўлиш талаб этилади. Америка мобил алоқа бозорининг тўртинчи етакчиси T-Mobile дастурда қатнашмаяпти.

21 март куни Apple компанияси iPhone ва iPad планшет компьютерларининг энг сўнгги моделлари тақдимотини ўтказган эди. 4 дюйм экранли iPhone SE, Apple A9 процессори билан жиҳозланган, 12 мегапикселли асосий камера ўрнатилган. У тўрт хил рангда, тилла, пушти, кулранг ва кумушрангларда сотувга чиқарилади. Унинг 16 Гб хотирага эга модели АҚШда 399 доллар, 64 Гблиси эса 100 доллар қиммат, 499 доллар этиб белгиланган эди.