Бельгия ҳукумати Евроиттифоқ давлатларидан келмаган муҳожирларга "Интеграция қасамёди" — маҳаллий қадриятларни қабул қилиш ҳақидаги ҳужжатни имзолашларини шарт қилиб қўяди. Бу ҳақида Reuters нашри ҳукумат вакилининг сўзларига асосланиб хабар беради.

Фақат шундан сўнггина қочоқлар мамлакат ҳудудида яшаш ҳуқуқига эга бўладилар. Мазкур ҳужжатни Бельгияга 3 ойдан ортиқ муддатга келадиганлар имзолаши лозим, талабалар бундан мустасно. Ҳужжатда муҳожирлар террористик актларни амалга оширувчи ҳар қандай ҳаракатга йўл қўймасликка ҳамда кутилажак ҳужумлар тўғрисида маълумот беришга ёзма равишда ваъда берадилар. Бельгия парламенти "муҳожир ҳужжати" ҳақидаги таклифни яқин ойларда қабул қилиши кутилмоқда, деб хабар беради РИА Новости.

"Кўпчилик Бельгияга ўз анъаналарига эга бўлган бошқа мамалакатлардан ташриф буюради. Агар улар шу ерда яшашни хоҳласалар, у ҳолда улар бизнинг қадриятларимизни қабул қилишлари ҳақидаги ҳужжатга имзо қўйишлари шарт", деди Бельгия давлат котиби идорасининг муҳожирлар ва бошпана масалалари билан шуғулланувчи вакили Лоран Мутамбай.