Туркия президенти Ражаб Тойиб Эрдўған Озарбайжон президенти Илҳом Алиев билан телефон орқали суҳбатда Қорабоғ ихтилофида Бокуни қўллаб-қувватлашини айтди.

Суҳбат Эрдўған ташаббуси билан бўлиб ўтди. "Туркия президенти Арманистон
ва Озарбайжон қўшинлари туташадиган линиядаги воқеалар муносабати билан қўллаб-қувватлов ва якдиллик билдирди ҳамда турк халқи ҳамиша Озарбайжон ҳалқи билан ёнма-ён туришини айтди", дейилмоқда хабарда. Эрдўған озарбайжонлик ҳарбийларнинг ҳалок бўлиши муносабати билан ҳамдардлик сўзларини билдирди.

Ўз навбатида, Озарбайжон президенти Туркияга Қорабоғ ихтилофини тартибга солишдаги кўмаги учун миннатдорчилик билдирди. "Президент Илҳом Алиев Арманистон навбатдаги марта қўшинлар туташадиган линияда иғвогарлик ҳаракатларини амалга оширганини, Озарбайжон позицияларига ҳужум қилганини айтди. Озарбайжон қуролли кучлари ҳужумни қайтаришди, қарши томон тегишлича жавоб олди", дейилмоқда Озарбайжон томони берган хабарда.