Amtrak темир йўл компаниясининг йўловчи поезди Филадельфия шаҳри яқинида рельсларда турган экскаваторга келиб урилиши оқибатида 2 киши ҳалок бўлди. Бу ҳақда журналистларга Филадельфия яқинидаги Честер шаҳри ўт ўчириш бошқармаси вакиллари маълум қилди.

ABC телекомпанияси маълумотларига кўра, 30 га яқин киши жароҳат олган, бироқ бу расман тасдиқланмаган. Amtrak’да маълум қилинишича, поезд Нью-Йоркдан Саванна шаҳрига кетаётган бўлган. Умумий ҳисобда поездда 341 йўловчи ва поезд бригадасининг 7 нафар аъзоси бўлган.

Поезд экскаватор билан тўқнашиши оқибатида локомотив рельслардан чиқиб кетган. Фалокат туфайли Филадельфия ва Нью-Йорк ўртасидаги темир йўл алоқаси қисман тўхтатилган.

2015 йил майида ҳам Amtrak поезди Филадельфия яқинида рельслардан чиқиб кетганди. Ўшандаги фалокат оқибатида 8 киши ҳалок бўлганди, 200 дан кўпроқ киши жароҳат олганди. Поезд рухсат берилган тезликдан анча юқорироқ тезлик билан ҳаракатланаётган бўлган. Кейинроқ аниқланишича, поезд машинист хатога йўл қўйган вазиятда поездни автоматик секинлаштирувчи ёки тўхтатувчи хавфсизлик тизими билан жиҳозланмаган бўлган.