Антонио Конте ўзининг «Челси» билан 3 йиллик шартнома имзолагани ҳақидаги хабар эълон қилинганига муносабатини билдириб ўтди.

«Мен «Челси»да иш бошлашимни ўйлаб бироз тўлқинланмоқдаман. Мен ҳозир миллий терма жамоа бош мураббийиман ва бундан фахрланаман. Бу ўриндаги тажриба орқали «Челси» жамоасида ишлашим осон бўлади.

Мен лондонликлар жамоасида фаолият кўрсатувчи барча билан ҳамда премьер-лигадаги рақиблар билан учрашишимизни сабрсизлик билан кутаман. «Челси» ва инглиз футболини ҳамиша кузатиб келганман ва бу мамлакатдаги мухлисларнинг қандай эҳтиросли эканликларини яхши биламан. Менда Италияда эришган муваффақиятларимга Англиядаги ютуқларимни қўшиб қўйиш иштиёқи бор.

Мен ўзаро шартномамиз ҳақида ҳозирданоқ эълон қилинганидан хурсандман. Энди барча бу ҳақда билади ва турли тахминларга чек қўйилади. Мен Италия терма жамоасида бор диққат-эътиборим билан ишлашда давом этаман. Энди «Челси» ҳақидаги масалаларга Европа чемпионатидан кейин қайтамиз», – дейди Конте.

Эслатиб ўтамиз, Конте бугун «Челси» билан 3 йиллик шартнома тузди.

У 3 йил давомида 20 миллион евро миқдорида маош олади.