Architecture and Vision итальян бюроси архитекторлари Африканинг энг ночор ҳудудларида сув йиғувчи конструкция прототипини яратишни ўз олдиларига вазифа қилиб қўйгандилар. 1000 доллар нархдаги, маҳаллий материалларга асосланган ҳолда яратилувчи Warka Water деб номланган бу конструкция кунига 100 литргача сув йиға олади.

Warka Water тизими сув йиғишда гравитация, конденсация ва буғланишдан фойдаланади ҳамда электр энергия талаб қилмайди. Қурилма минора тарзида тўқиб чиқилган бамбук ёғочларидан иборат бўлиб, унинг ичига тўр тортилади. Бу тўрга шудринг ва тумандаги сув томчилар йиғилади ва ёмғир суви билан бирга коллектор орқали ягона идишга оқиб тушади.

Архитекторлар яратган тизимни қишлоқ аҳолисининг ўзи бемалол махсус қурилмалар ва анжомларсиз барпо эта олади. Архитекторлар конструкциянинг 12 хил прототипини синовдан ўтказишди. Энг мақбул конструкция 9,5 метр баландликка ва 3,7 метр диаметрга эга бўлиб, бир кун ичида 10 киши ёрдамида барпо этилади.

Бу лойиҳанинг Африкада амалга оширилиши ва кўплаб сонда ўрнатилиши 2019 йилга режалаштирилган. Унгача архитекторлар сув йиғиш ва нарх борасида энг самарали мақбул ечимни топиш учун конструкцияларни синовдан ўтказишни давом эттирадилар.