Озарбайжон Мудофаа вазирлиги Тоғли Қорабоғ ҳудудида давом этаётган қуролли тўқнашувлар давомида Арманистон армиясига тегишли бўлган 12та танк, шунингдек 170 нафар арманистонлик аскар йўқ қилингани ҳақида маълум қилди. Бу ҳақидаги эълон 4 апрель куни вазирлик расмий сайтига жойлаштирилган.

"Кейинги соатларда биз арманистонликларнинг ҳарбий иғволарига қарши жавоб қайтардик. Озарбайжон қуролли кучлари томонидан йўлланган зарбалар воситасида арманлар ваҳимага тушган ҳолда қуролларини ташлаб чекина бошлади", дейди Озарбайжон Мудофаа вазири Вагиф Дяргахли.

Ҳужум давомида арманистонлик генераллар ва полковниклар ҳалок бўлгани айтилган. Мудофаа вазирлиги, шунингдек, ўтказилган операцияга алоқадор видеолавҳаларни чоп этишга ваъда қилган.

Вагиф Дяргахли маҳаллий вақт билан соат 16:00да фронт чизиғида қуролли тўқнашувлар давом этаётгани ҳақида маълум қилган.

"Шу дақиқаларда Агдер-Тертер ва Физули-Хўжаванд йўналишларида вазият кескинлигича қолмоқда. Охирги маълумотларга кўра, арманистонликлар ҳужумга ўтишгач, Озарбайжон қуролли кучлари жавоб қайтаришган", дейди у.

Ўз навбатида, Ереван Арманистон артиллериячилари Қорабоғ—Озарбайжон тўқнашув чизиғида Озарбайжон захира бўлинмаларини йўқ қилганлигини баён қилган.

Эслатиб ўтамиз, 2 апрелга ўтар кечаси Тоғли Қорабоғдаги Озарбайжон ва Арманистон чегарасида тўқнашувлар келиб чиққан ва ҳозирга қадар давом этмоқда.