Римнинг "Лацио" клуби ўзининг расмий сайтида жамоа бош мураббийи Стефано Пиолининг ўз лавозимидан бўшатилишини эълон қилди. Эндиликда жамоага 2014 йилдан бери жамоанинг ёшлари билан ишлаб келган, собиқ футболчи Симоне Индзаги мураббийлик қилади.

Пиоли "Лацио" Италия А сериясининг 31-турида "Рома"дан 1:4 ҳисобида йирик мағлубиятга учраганидан кейин бир неча соат ўтиб истеъфога жўнатилди.

Пиоли "Лацио"ни 2014 йилнинг июнидан бери бошқариб келган. Жамоа айни вақтда мусобақа жадвалида 8-ўринни эгалламоқда.