Вашингтонда жойлашган журналистик тадқиқотлар халқаро консорциуми (ISIJ) ўз мижозларига офшор компаниялар ташкил қилишда ёрдам берган «Mossack Fonseca» юридик фирмаси ҳақида маълумот тақдим қилди.

Agency France Presse берган маълумотга кўра, Панамадаги «Mossack Fonseca» фирмаси футбол оламида 20 нафардан ортиқ таниқли шахслар билан ҳам ҳамкорлик қилган. Улар орасида «Барселона», «Манчестер Юнайтед» ва «Реал»нинг ҳозирда фаолият олиб бораётган ва собиқ футболчилари бор. Жумладан, «Барселона» ҳужумчиси Лионель Месси ва унинг отаси Хорхенинг Панамада рўйхатдан ўтган «Mega Star Enterprises» офшор компанияси борлиги аниқланган.

Шунингдек, УЕФА раҳбари саналган Мишель Платини ҳам 2007 йилда мазкур фирма хизматларидан фойдаланган.

Мессининг фирмаси ҳақида «Mossack Fonseca» ҳужжатларида илк марта 2013 йилнинг 13 июнь куни тилга олинган. Айнан ўша пайтда Испания прокуратураси Месси ва унинг отасига нисбатан айбловни илгари сурганди.

Бундан ташқари, ҳужжатларда жаҳоннинг 20дан ортиқ клублари хўжайинларига тегишли офшор ташкилотлар аниқланган. Улар орасида «Интер» ва «Бока Хуниорс» клублари хўжайинлари ҳам бор.

Ҳужжатларда Бразилия, Уругвай, Буюк Британия, Туркии, Сербия, Голландия, Швеция ва бошқа мамлакатлар футболчилари тилга олинган. Ўйинчилар ўз қиёфаси ҳуқуқининг сотилиши ва рекламанинг бошқа турларидан тушган даромадларни сақлаш учун офшор компаниялар ташкил қилишда «Mossack Fonseca» хизматларидан фойдаланган.

Жумладан, ҳужжатларда Леонардо Ульоа, Иван Саморано ва Габриэль Хайнценинг номлари қайд этилгани аниқланган. Улар маблағни офшор компанияларда сақлаш орқали солиқдан қочишга ҳаракат қилишган.