Ангренлик муқаддам судланган Рустам Маназаров (исм-фамилияси ўзгартирилган) фирибгарлик йўлига яна бош суқиб, бу ишда янги танишлар орттирди. Бу ҳақда “Ҳуқуқ” нашри ёзмоқда.

Олмалиқ кон-металлургия комбинатида шахта қурилиши бошқармасида ер ости лаҳмчиси бўлиб ишлаб келаётган Мирзакарим Аббосов Ангрен кон бошқармасида ишлашни хоҳлаб қолди. Бу эса Рустамга қўл келди. У ишга жойлаб қўяман деб Мирзакаримдан 5000 АҚШ доллари олади.

Орадан кўп ўтмай, “Олмалиқ" КМК АЖ Ангрен қувур заводи унитар корхонаси ишчиси Ҳалимбек Ширанов Ангрен кон бошқармасига ишга ўтказишни сўраб келди. Рустам ундан бу ишни ҳал қилиб бериши учун 2000 АҚШ долларини қўлга киритди. Фирибгар ишини давом эттирди. У Мирзакарим Холбоевнинг ишончини қозониб, ишга жойлаштириб қўяман деб 2000 АҚШ долларини олди.

Аммо у қонун устувор юртда яшаётганини унутган эди. Жабрланувчилар уни судга беришди. Суд Рустам Маназаровга 7 йил-у 1 ой озодликдан маҳрум этиш жазосини тайинлади.