Қозоғистон пойтахти Вазирликлар уйининг тўртинчи йўлагида давлат хизматчиларининг смартфонлари бор-йўқлиги текширилиши оқибатида турнақатор навбат ҳосил бўлди. Бу ҳақда BNews.kz хабар берди.

“Бизни Вазирликлар уйига уяли алоқа воситалари билан киргизишмаяпти. Шунинг учун шундай узун навбатлар ҳосил бўлди. Ҳаммамизни, менимча, икки ҳафта аввал огоҳлантиришган эди. Шунчаки биринчи куни баъзиларнинг ёдидан кўтарилган, баъзилар хизмат сафарида бўлиб, телефонини уйига ташлаб келолмаган. Мен ўзим смартфонимни олиб келмадим”, - деди “Статистика Комитети” бош мутахассиси Эрлан Қорабоев.

Ходимнинг сўзларига кўра, бинода буюмларни сақлаш учун махсус катакчалар фақат ташриф буюрувчиларга мўлжалланган. Вазирликлар уйида фаолият юритувчи ходимларнинг буюмлари учун эса бундай ячейкалар ўрнатилмаган.

Давлат хизматчилари фақатгина блютуз, диктофон, камера, интернети бўлмаган телефон аппаратларинигина ишга олиб келишларига рухсат берилган.

"Статистика Комитети" матбуот котиби Динара Алимованинг сўзларига кўра, ходимлар бир ой аввал огоҳлантирилган.

“Биз 4 апрелдан бошлаб ишга смартфонлар олиб киришни тақиқловчи қоида асосида иш тутяпмиз. Бу қоидани унутганлар смартфонларини машинада қолдиришларига тўғри келади. Келгусида хизматчилар учун ҳам ячейкалар ташкил этилади”, - маълум қилди матбуот котиби.

Алимованинг сўзларига кўра, планшет ва ноутбукларни ишга олиб келиш аввал ҳам тақиқланган. Иш юзасидан зарурат туғилса, расмий мурожаатнома ёзилган.