Озарбайжон мудофаа вазирлиги матбуот хизмати бошлиғи Вагиф Даргоҳли Озарбайжон мудофаа вазири Зокир Гасанов агар Арманистон Озарбайжон аҳоли пунктларини ўққа тутишни тўхтатмаса, Степанакерт ва Тоғли Қорабоғнинг бошқа ҳудудларига артиллерия зарбаларини беришни бошлашга буйруқ беришини айтди. Бу ҳақда РИА “Новости” ахборот агентлиги хабар бермоқда.

"Арманистон Қорабоғдаги тўқнашувлар чизиғидаги ўз йўқотишларини аҳоли пунктларини ўққа тутиш билан компенсация қилишни бошлади. Бир неча огоҳлантиришларга қарамасдан, ўққа тутишлар давом этмоқда. Озарбайжон мудофаа вазири агар арман томони аҳоли пунктларини ўққа тутишни бас қилмаса, Ханкенди ва бошқа ҳудудлардаги арман позицияларига кучли артиллерия зарбаларини беришга буйруқ беради", деб айтди Даргоҳли.

Аввалроқ Озарбайжон мудофаа вазирлиги бир неча соат ичида Арманистоннинг 170 га яқин ҳарбийси тан олинмаган Тоғли Қорабоғда йўқ қилинганини маълум қилганди.

Тоғли Қорабоғдаги ихтилоф 2 апрель куни бошланди. Томонлар бир-бирини тинчлик сулҳини бузишда айбламоқда.